5 قواعد للمتاجرة في اسواق المال من ED Seykota


Print Friendly, PDF & Email

خليك عارف ان أهم حاجة في البورصة أو الفوركس أو أي سوق مال عموماً هو إدارتك لرأس مالك المظبوط .. لأن ده اللي بيتوقف عليه جزء كبير من نجاحك .. في الحلقات الجايه هنتكلم على موضوع إدارة رأس المال و إدارة المخاطر بإستفاضة كبيرة أوووي .. خلينا نبدأ النهارده بمجموعة من قواعد المتاجرة في أسواق المال لشخص اسمه ED Seykota.

 

أول قاعدة أقطع خسائرك : أوعى تسيب فلوسك تخسر و تقول إن السهم مش بياكل و يشرب أوعى تسيب نفسك تخسر فلوسك و تقول ما السوق كده كده هيطلع .. السوق ممكن يطلع فعلاً بس بعد ما تكون خسرت رأس مالك كله .

 

تاني قاعدة إتبع الفائزين : الراجل ED Seykota  ده لما اتكلم على الجزئية دي كان بيتكلم عن إنك المفروض تشوف مين اللي مسيطر حالياً و تتبعه و قصده لو أنت في سوق الأسهم بتتبع مثلاً المشتريين لو هما المسيطرين .. و تبيع أول ما البياع يسيطر .. و لو أنت في سوق الفوركس هتشتري مع المشتري و تبيع مع البائع .

 

لو حبيت تسمع وجهه نظرنــا : إتبع الاتجاه ده هيخليك من أوائل الفائزين و كمان هيخليك أوائل الناس اللي بتخرج من السوق لما الاتجاه يتغير .

 

12241308_1064342390262850_3721943812183055985_n

تالت قاعدة  أجعل خسائرك صغيرة : الموضوع ده مفيد ليه ؟؟ .. حاول تتخيل معايا إنك شخص مش عارف أي أداه تساعدك تكسب .. بس ملتزم إنك لما تدخل صفقة تدخلها بوقف خسائر قليل .. يعني السعر اللي لو وصلت ليه خسايرك أنت مينفعش تعديه .. و في نفس الوقت لو كسبان بتلتزم ( و حط تحت تلتزم دي مليون خط ) إنـك تخرج بمكسب كبير ( اللي أنت بتكون محدده قبل ما تدخل الصفقة )

 

= هتلاقي نفسك لو خسرت صفقه و لا أتنين ولا حتى تلاتة ممكن تيجي صفقة تكسب معاك تعوضلك ده كله 😀 صح ؟؟ طيب لو إتعلمت شوية أدوات و بقى ربنا يكرمك و كسبت صفقة و خسرت صفقة ؟ هتلاقي إن مكسبك غطى خسائرك ؟؟ يبقي في النهاية أنت خارج كسبان

 

رابع قاعدة  إتبع القواعد : خلينا بدون أسئلة لو حطيت لنفسك قاعدة إنك مثلاً مش هتخسر في صفقة أكتر من 5 % أوعى تخلفها لما تلاقي نفسك خسران الموضوع إنك لو خلفت قواعدك مرة حتى لو نجحت هتخلف مرة و أتنين و تلاتة و عشرة و في الأخر هتخسر فلوسك … و أكيد دي أخر حاجة أنت داخل البورصة عشانها .. يبقي إلتزم بالقواعد اللي أنت حتى هتحطها لنفسك.

 

خامس قاعدة و اللي مش موجودة في الصورة :  أعرف إمتى خلفت القواعد .. لأنك أكيد في وقت مشاعرك هتخونك .. و ياريت لما تبدأ تعرف إنك غلطان تفوق بسرعة و تلتزم بالقواعد اللي أنت حطيتها لنفسك.

 

قولنا بقى إيه القواعد اللي أنت بتشوف إنها مهمة ليك في البورصة و حابب تشاركنا بيها ؟؟

شاهد ايضاً

ساعدنا في نشر المعرفةShare on LinkedInShare on RedditTweet about this on TwitterShare on Google+Share on Facebook
كريم عصام

كريم عصام

مدير إدارة التسويق و محلل فني للأسواق العربية بـ Chart Voice ، عمل سابقا كمحلل فني بشركة ICN للاستشارات المالية