أول مقالة ليك عن البورصة ممكن تكون الأخيرة !!

بورصة,اسهم,فوركس

Print Friendly

الحلقة الأولى من أي مسلسل لازم تشدك عشان تخليك تتابع المسلسل وتتابع احداثه وتبقى عايز تستني من الحلقة للحلقة عشان تشوف المسلسل .. بس ده فى المسلسلات او السينمات … لكن فى البورصة وفى حلقاتنا اللي جايا الوضع هيكون مختلف .. انت لو مش حاسس انك فعلاً مهتم أوي بالمجال وحاسس انك مش عايز تطور نفسك فيه يبقي السلسله اللي هتبدأ من أول المقالة دي مش مهمه بالنسبة ليك والأحسن انك تستفيد بوقتك في حاجه تانية.

 

إنما لو حاسس انك نفسك تعرف أكتر عن المجال حتى لو مش عارف أي حاجه عنه خالص .. ونفسك إنك تشتغل فيه أو تستثمر بشكل أحسن فى المجال أو تعرف إزاي تتحرك في المجال بشكل مظبوط وبأسس و قواعد مظبوطة .. يبقى نوعدك إنك قدام سلسلة حلقات هتشدك جداً وتساعدك في تطوير نفسك جوا المجال.

 

نبدأ مع بعض بأول كلمة هتقابلك فى مجال اسواق المال “البورصة” .. يعنى ايه بورصة ؟؟؟

حاول تتخيل معايا انـك و 3 صحابك قررتوا انكم تفتحوا شركه و أول حاجه هتبدأوا تحددوهـا بعد فكرة الشركة .. هي رأس مال الشركة لو افترضنا ان رأس مال الشركة مليون جنيه ونصيب كل واحد فيكم اللي هيدفعه منكم انتوا الـ 4 هو 250 الف جنيه  :roll:

 

وكده هيكون كل شخص منكم بيملك حوالي 25 % من رأس مال الشركة وده معناه لو الشركه كسبت 100 جنيه كل شخص من الأربعه هيكون نصيبه 25 جنيه.

 

 طيب لو الشركه دي محتاجه تزود راس مالها علشان تطور أو تنتج حاجات جديدة الأربع أشخاص دول هيكونوا محتاجين شركاء جداد ، يدخلوا معاهم يدفعوا فلوس مقابل نسبة من الشركه وبالتالي نسبة من أرباحها.

طيب لو أنت شركة برأس مال مش كبير هتعرف تنظم الدنيا دي لكن  لو شركتك برأس مال كبير الوضع بيكون ازاي ؟؟

هنا بيجي دور البورصة

 

• البورصة هي المكان اللي تقدر فيه تشتري نسبة من أي شركه

و ده جوا البورصة بيبقي اسمه سهم وهنتكلم عليه كتير بكل تفاصيله في الحلقات اللي جايه بس اللي لازم تعرفه دلوقتي ان السهم : هو قيمة نسبتك في راس مال الشركه واللي بناء علي عدد الأسهم اللي معاك بيتحدد أرباحك.

 

يبقى بإختصار البورصة هي طريقه واضحه للتمويل بدل ما تلجأ للبنك لو انت صاحب شركه كبيره ،، وكمان هي وسيله للاستثمار اللي يديلك فايده أعلي لو انت مستثمر .. كان مهم عندنـا انك تفهم فكره البورصة يعني ايـه قبل ما تتعمق وتعرف أكتر فيها . دلوقتي هتلاقي بيدور في بالك اسئلة كتير زي : 

 

  • ازاي بقى اختار السهم المناسب ؟؟
  • ايه هى انواع الأسهم اللي في البورصة ؟؟
  • يا ترى جوا البورصة ممكن استثمر في حاجه غير الأسهم ؟؟

 

كل دي حاجات هنتكلم فيها مع بعض فيها الحلقات الجايا وأكتر منها كمان .. لو عجبك المقال تقدر تعمل شير عشان الموضوع يفيد ناس أكتر ولو عندك اي سؤال واستفسار سيبهولنا في كومنت واحنا هنرد عليك 😉

تقدر تشوف الحلقة التانية من هنا

ساعدنا في نشر المعرفةShare on LinkedInShare on RedditTweet about this on TwitterShare on Google+Share on Facebook

التعليقات

التعليقات

كريم عصام

كريم عصام

مدير إدارة التسويق و محلل فني للأسواق العربية بـ Chart Voice ، عمل سابقا كمحلل فني بشركة ICN للاستشارات المالية