أجمل شئ في البورصة الخسارة .. تعرف ليه ؟؟


Print Friendly, PDF & Email

خلينا نكون متفقين ان مفيش حلاوه من غير نار ؟؟ يعني عمرِك ما هتكوني طباخه شاطرة ومتتلسعيش ولو مرة .. بس لو عامله حسابك “اللسعه” هتكون خفيفه ؟؟ وهتستفادي المره الجايا وتتعلمي من غلطتك .

 

و زي ما دايما بقول أنك ممكن تقيس كل حاجه بتحصل في حياتك على البورصة “فكر في السطرين اللي فوق لو انت في البورصة” وخسرت مره ؟؟ في ناس بتشوف ان الدنيا خلصت علي كده .. بس انا عمري ما شوفت كده .

 

لو سألتني هقولك ان أجمل شئ في البورصة هي الخساره .. بس طبعا مش طول الوقت 😀 انت في كل مره بتخسر فيها بتتعلم حاجه جديد وشطارتك انك متكررهاش عشان تستفاد الأيام الجايا في صفقاتك جوا البورصة .

 

طيب ازاي مكررش اخطائي جوا البورصة ؟؟

 

Alexander Elder
Alexander Elder

 

في شخص أسمه Alexander Elder  ألف كتاب أسمه Trading For A living  بينصح في المتاجرين في البورصة والمستثمرين انه يكون عنده ورقه او كشكول يكتب فيهم شوية النقط دي في كل صفقه هياخدها .. والنقط كالتالي : 

 

  • ليه دخلت الصفقه دي ؟؟
  • ايه الإشارات اللي اعتمدت عليها في دخولك الصفقه ؟؟
  • ايه المشاعر اللي كانت مسيطره عليك اثناء دخولك الصفقة ؟؟
  • ازاي قفلت الصفقه ؟؟ ايه الاشارات اللي كانت سبب في اغلاقك للصفقة ؟
  • ايه كانت مشاعرك وانت بتاخد قرار اغلاق الصفقة ؟
  • ايه الخطأ اللي ارتكبته في الصفقه دي ؟؟

 

على الرغم انك ممكن تشوف انها نصائح بسيطه بس تعالا نتخيل اننا لو هنطبقها عملي ايه اللي هيحصل ؟؟


 

1- ليه دخلت الصفقه ؟

 

انت مش مجبر في البورصة او الفوركس انك تدخل صفقه يعني مش لازم يكون في معاد ثابت تدخل فيه صفقاتك .. انت بتدخل صفقاتك لما بتلاقي فرصه مناسبه ليك ولحجم استثمارك ؟؟

 

لأن اوقات كتير شوفت انـ في ناس مدمنه انها تدخل صفقات .. لازم تدخل صفقه كل يوم ،، ويترتب وعليه انه هيلاقي نفسه بيدخل الصفقه من غير ما يكون فكر فيها كويس وبالتالي يلاقي نفسه خارج خسران

 

= المستفيد الوحيد في الحاله دي هو شركه السمسرة او شركه الوساطه .. لأن العميل كل ما هينفذ صفقه سواء كان كسب او خسر فـ هما ليهم عمولتهم .. وبالتالي لو انت بتدخل الصفقه عمال علي بطال .. انت في الآخر الخسران الوحيد .. وهتلاقي ان في واحد تاني كان حاسبها صح هو اللي كسب.

 

السرعه احياناً مش مطلوبه لأنها ممكن تكون سبب خسارتك

 

2- ايه الإشارات اللي دخلت بسببها الصفقه ؟؟

 

كل واحد فينا ليه الأدوات اللي بيثق في جودتها واللي بيستخدمها عشان يعرف هيدخل امتي الصفقه دي ؟؟ بس ايه رأيك لو في كل صفقه كتبت انا دخلت الصفقه دي عشان كان فيه اشاره من الأداه كذا وكذا وكذا ؟؟ لو إشاراتك طلعت صح والسوق اتحرك في الطريق اللي انت قولت عليه ؟؟ هتزيد درجه ثقتك بأدواتك ؟؟ ولو العكس ؟؟ هتلاقي نفسك بتحاول تشوف الخطأ فين وتطوروا وتتعلم وتشوف المشكلة كانت فين ؟؟ لحد ما توصل لأفضل ادوات مناسبه ليك وبتجيب افضل نتائج معاك ؟؟


 

3- ايه المشاعر اللي كانت مسيطرة عليك ؟؟

 

يا ترى كنت عايز تدخل الصفقه عشان تعوّض خسايرك ؟؟ يا ترى كنت حاسس بخوف وتردد من دخولك الصفقه ؟؟ حاسس انك ملهوووف على انك تدخل عشان تحقق ارباح وتدفع اقساطك وتغيّر العربية ؟؟

 

اللي هيقولك انت هتقدر في وقت تسيطر سيطرة كامله علي مشاعرك بدرجه 100 % يبقي بيضحك عليك انما انا مش هقولك غير “انك عمرك ما هتنجح لو دخلت صفقه بناء على مشاعرك” .. لازم تقدر تسيطر عليها او على الأقل تخليها متتحكمش فيك في دخولك او خروجك من الصفقه وان يكون المتحكم في قرارك هو ادواتك .. النقطه دي مع انها تبان كلام نظري .. بس غاية الأهمية .. نفسيتك وانت بتاجر بتتحكم كتير اوووي في قراراتك ..


 

4- ازاي قفلت الصفقه ؟؟

 

النقطة دي مهمه جدا .. كل الكتب بتقولك جمله حلوه جداً خليك دايما فاكرها .. مش مهم انت دلوقتي بعد دخولك الصفقه انت في الجانب الصح او الغلط ؟؟ المهم انت هتتصرف ازاي ؟؟

 

النصيحة اللي هقولهالك : طالما دخلت الصفقه  بناء علي ادوات معينه .. خليك مع الصفقه طالما الأدوات بتؤكد ليك قرارك .. طبعاً مع الأخذ في الاعتبار كل ادوات ادارة المخاطر من انك حاطط لنفسك مستوى وقف خسائر مظبوط وغيرها …

 

 الحاجه اللي تخليك تخرج من صفقتك قبل ما توصل لنقطه وقف الخسارة او المستهدف اللي انت حاطه هو أن ادواتك او رؤيتك اتغيرت ولقيت نفسك بـتشوف حاجه تانيه بتحصل غير اللي انت كنت داخل بسببها الصفقه ؟؟ وعليه قفلت صفقتك عشان رؤيتك اتغيرت


 

5- ايه المشاعر اللي كانت بتحكمك اثناء خروجك من الصفقه ؟؟

 

احنا اتكلمنا في النقطة رقم 4 على المشاعر وعرفنا انها سبب في تشتيت قرارك لو سيطرت عليك، والدليل ان في ناس كتيره بتقدر تلتزم بوقف الخسارة لكن لما بتكون محققه مكسب ممكن تقفل الصفقه علي مكسب قليل قبل ما توصل للمستهدف اللي كانوا حاطينوا لنفسهم قبل دخول الصفقه،، لأنهم بيخافوا السعر ميوصلش للمستهدف

 

والغريبه انـ السعر بيوصل .. وبيحس الشخص بالندم انه كان يستحق مكسب اكبر من اللي خرج عليه .. واحساسه بالندم ده بيخليه عايز يدخل تاني عشان يعوض من غير ما يكون دارس قرارة كويس فـ بنسبة كبيرة بيخسر .

 

اتحكم في مشاعرك لأنها عنصر مؤثر جداً علي قراراتك .. مش بس في البورصة بل وفي كل حياتك


 

6- ايه الخطأ اللي في صفقتك ؟؟

 

كل صفقة ممكن تطلع منها بخطأ او حاجه لو كنت عملتها صح شوية عن كده كانت نتائجك بقت احسن ؟؟ سجل دايما الخطأ عشان تقدر تستفيد منه قدام

 

دلوقتي بس انت عرفت ليه الخساره ممكن تكون مكسب كبير لو بس بصيت للأمور من زاوية تانية ؟؟ وقدرت تستفاد منها ؟؟ قولنا رأيك في المقالة وقولنا ايه اكتر حاجه ممكن تبدأ تطبقها عشان شغلك يكون احسن في البورصة ؟؟

وتقدر كمان تشوف 5 قواعد في المتاجرة من هنا

خليك ساموراي في البورصة … 7 خطوات نحو ربح صفقاتك

شاهد ايضاً

ساعدنا في نشر المعرفةShare on LinkedInShare on RedditTweet about this on TwitterShare on Google+Share on Facebook
كريم عصام

كريم عصام

مدير إدارة التسويق و محلل فني للأسواق العربية بـ Chart Voice ، عمل سابقا كمحلل فني بشركة ICN للاستشارات المالية