السهم الأبيض ينفع في اليوم الأسود – حكايات بورصجى

الأسهم في البورصة

Print Friendly, PDF & Email

أول كلمه بتسمع عنها في البورصة بعد كلمه بورصة نفسها هي كلمه “سهم” وهتسمع في الأفلام بيقولوا دايما : 

“ده انا الأسهم بتاعتي كسبت – ده انا اسهمي خسرت”

ايه حكاية الأسهم دي بقي

قبل ما تفكر انت هتشتري في سهم ايه وتبيع ايه ؟؟ انت مهم انك تعرف يعني ايه سهم وايه هي انواعه ؟؟ انت عمرك ما هتعرف تستخدم الشاكوش بشكل ينفعك “لو مكنتش عارف فايدته ايه !!

وده اللي هنعرفه مع بعض في حكاية مصطفي اللي هتعرفوها اكتر في السطور الجايا .

 


 

  مشهد من منزل مصطفي  :

 

بعد الكثير من الوقت الذى قضاه مصطفي في التفكير في الأستثمار في البورصة قرر أن يذهب اليوم إلي احدى شركات البورصة و جمع بعض المعلومات حتى يتضح إليه الرؤية كاملة ويتخذ قراره بدخول مجال البورصة ام لأ .

 

وبعد فتحه لموقع البحث الشهير “جوجل” بدأ في البحث عن عنوان احدى الشركات وجاء امامه (شركه الشوبوكشي) والذي كان شعارها “الأمن والآمان داخل البورصة مع الشوبكشي” ، وبالفعل سجل مصطفى العنوان واتخذ طريقه إلي الشركه بعد ان رتب مجموعه من الأسئلة ليستفسر عنها من موظفي الشركة .
مشهد من داخل شركه الشوبكشي

 

العديد من المكاتب فوقها الكثير من الشاشات جميعها تعرض نفس الحدث يبدو ان هذه الحلقه الأخيرة من مسلسل سعد الدالي ولكن مهلاً انه ليس مسلسل سعد الدالي ” انها ارقام .. الكثير من الأرقام ” ، علمت فيما بعد ان هذه تدعى شاشه اسعار يُعرض عليها اسعار الأسهم في البورصة لحظه بلحظه .

 

وجدت موظفه حسناء المظهر تتسم بالأناقة كما يتسم كل ركن في هذا المكان، و فوراً قررت ان اتوجه إليها بسؤالي الأول وكان الحوار كالتالي :

مصطفي : مساء الخير انا كنت عايز استفسر عن شوية معلومات عشان عايز استثمر قرشين في البورصة

الموظفة : انا تحت أمرك .. اسأل وانا هجاوبك

مصطفي : انا كنت عايز اعرف الأول يعني ايه بورصة وليه موجوده اصلاً ؟؟

الموظفة : مع ان ده موضوع يطول شرحه بس خد الورقة دي اقراها من هنا وهتعرف يعني ايه بورصة وبعدها نكمل كلامنا

 


 

بعد دقائق عدت وابتسامه تتصدر وجهي وتوجهت فوراً إلي نفس الموظفة وسألتها

 

مصطفي : انا عرفت يعني ايه بورصة ومتحمس جداً عشان اشتري واتاجر في البورصة بس كنت عايز اعرف يعني ايه اسهم ؟؟

 

الموظفة : السهم هو ورقة مالية وتعتبر حصة في رأس مال الشركة ،، يعني لو هنفترض إن شركة ما أصدرت عدد من الأسهم قيمة كل سهم 100 جنيه ، معنى كده إني لو أشتريت 10 أسهم يبقى أنا كده شريك في الشركة ديه بحصة 1000 جنيه من رأس مال الشركة ، و عشان كده قيمة السهم بتقل بضعف أداء الشركة و بتزيد بزيادة نشاطها و أرباحها و ده لأني شريك جوه الشركة.

 

مصطفي : جميل جداً انا بصراحه مش عارف من غير شركه الشوبوكشي كنت عملت ايه.

 

الموظفة : عشان الكلمتين دول خليني اقولك بقي ان فى نوع تاني من الأسهم اسمه الأسهم الممتازه ودي  أسهم بتاخد بعض خواص الأسهم العادية و بعض خواص السندات ، أولا هي تعتبر صكوك مديونية على الشركة و بيكون في المعظم ليها نسبة عائد ثابت من القيمة الأسمية للسهم في حالة توزيعات الأرباح و بعد كده بتحصل على نسبتها في توزيع الأرباح زيها زي الأسهم العادية.

 

و كمان في حالة تصفيه الشركة و الإفلاس هي بيكون ليها أسبقية في الحصول على حقوقها قبل الأسهم العادية ، و لكن بعد السندات طبعا.

 

بس الحلو مبيكملش .. زي ما الأسهم الممتازة نسبة مخاطرتها اقل من الأسهم العادية فبالتالي مش بيكون ليها حق التصويت في الجمعية العمومية ، إلا إن بعض الإصدارات منها ممكن تدي لحاملها الحق في حضور الجمعيات العمومية و إنتخاب أعضاء مجلس الإدارة.
بس عشان كده هي اسمها أسهم ممتازة لأنها شبه الأسهم في بعض الحاجات و لكن ليها مزايا أكتر و مخاطر أقل شوفت الموضوع بسيط إزاي بقى.

 

مصطفي : تمام انا حاسس اني طولت عليكي انهارده هاجيلكم بكره بقي اول ما تفتحوا عشان اعرف يعني ايه سندات 😀

 

الموظفة : شركه الشوبوكشي في خدمه حضرتك يا فندم


الملخص :

 

أنت دلوقتي عرفت يعني ايه بورصة ويعني ايه اسهم وايه فكره الأسهم الممتازة … كان مهم جداً قبل ما تعرف ازاي تشتري وتبيع اسهم “انك تفهم يعني ايه اسهم تفهم انك بتشتري سهم شركه عشان متوقع ان السهم ده هيطلع وبالتالي انت هتكسب وخليك دايما فاكر ان كل ما بتختار السهم صح كل ما كانت فرصتك في المكسب أفضل، يعني اوعى تجري على سهم لمجرد انك سامع الناس كلها بتشتري فيه … لأنك في اللحظه دي هتكون بتشتري سهم وانت مدرستوش فممكن جداً تخسر” 

افتكر ان السهم الأبيض ينفعك في اليوم الأسود

والأيام الجايا هنعرف مع شركه الشوبوكشي حاجات تانيه كتير ؟؟ ونفهم ازاي نختار السهم اللي هنشتريه جوا البورصة . 

 

قولولنا تعليقكم على الموضوع لأنه اكيد هيساعدنا في الموضوعات اللي جايا عشان دايما نطوّر من شغلنا بشكل يحقق اكبر استفاده لكل حد هيقراه 

شاهد ايضاً

ساعدنا في نشر المعرفةShare on LinkedInShare on RedditTweet about this on TwitterShare on Google+Share on Facebook
كريم عصام

كريم عصام

مدير إدارة التسويق و محلل فني للأسواق العربية بـ Chart Voice ، عمل سابقا كمحلل فني بشركة ICN للاستشارات المالية