المضاربة سلاح ذو حدين … أعرف ليه؟؟


Print Friendly, PDF & Email

المضاربة لفظ بنسمعوا كتير و أوقات أكتر بيكون مرتبط بالبورصة …. ده محمدين باع الفدانين اللي حيلته و راح يضارب بتمنهم في البورصة

إيه هي المضاربة بقى؟؟!!

طيب خلونا نعرف إيه هي المضاربة في اللغة ؛ المضاربة هي مشتقة من الفعل “ضرب” فالضرب بمعنى الكسب وهي أيضاً مشتقة من الضرب في الأرض ، يضرب ضرباً بمعنى سار في ابتغاء الرزق أو ابتغاء الخير.

كنا بنتكلم عن المضاربة إصطلاحا فكنا لازم نتكلم لغة عربية فصحى ، طيب بعد ما عرفنا معناها في اللغة ما تيجوا نشوف المضاربة اللي عندنا في البورصة بقى هل توافقت مع المعنى ده ولا إتغيرت عنه.

بص يا سيدي … في الحقيقة إن المضاربة في البورصة اتغير معناها عن المعنى الاصطلاحي بشكل كبير و لم يتفقوا إلا في إنه نوع من أنواع اكتساب الرزق ؛ فهتلاقي إن المضاربة في البورصة مقترنة دايما بحاجتين:

أولا: هي تحقيق ربح من فروق الأسعار.

ثانيا: هي تحقيق الربح ده في فترة زمنية قصيرة.

      • بالنسبة للنقطة الأولى فالمضاربة دايما مش بتكون قائمة على تحقيق الأرباح من استثمار حقيقي من خلال دراسة متأنية لنشاط الشركة أو دراسة السهم ، و لكن بتكون قائمة على تحقيق ربح سريع من خلال الفرق بين سعر الشراء و سعر البيع نتيجة تحرك الأسعار في شكل تذبذبات.
    • أما النقطة التانية فدايما لما بتيجي تخش البورصة تلاقيه بيسألك أنت هتخش بغرض الإستثمار ولا بغرض المتاجرة ، لو بغرض الاستثمار فده معناه إنك هتختار شركة أدائها بيتحسن عشان تشارك فيها من خلال شرائك للأسهم و تحقق أرباح من خلال الأرباح الموزعة من الشركة على كل سهم ، و كذلك في المدى الطويل بيكون سعر السهم نفسه ارتفع ؛ لكن المضاربة أنت مش مستني فيها ولا أرباح موزعة ولا إرتفاع كبير في السعر أنت كل اللي محتاجه تغير في السعر سريع عشان تقدر تحقق ربح من الفرق بين سعر الشراء و سعر البيع.

طيب هل المضاربة ديه حاجة كويسة ولا حاجة وحشة؟؟

خلينا نقول إن المضاربة هي نوع من أنواع التحايل لتحقيق الربح ، لأن البورصة هدفها الرئيسي تحويل المدخرات إلى استثمارات و ده بييجي من شراء الأسهم الجيدة و الاستمرار فيها لمدة ، لكن المضاربة بتعمل تشوهات لحركة الأسعار في البورصة … ده غير إنها بتكون في أوقات كتير مش مبنية على أسس علمية مجرد بعض التكنيك عشان يشتري السهم بسعر و يبيعه بعديها علطول بسعر أعلى ، وده يخليه مرة تصيب معاه و أوقات كتيرة تخيب.

نقطة تانية مهمة جدا ألا و هي إن زي ما أنت اعتمدت على سهم حركته فيها تذبذب سريع عشان تكسب بسرعة ، تأكد إنك هيبقى عندك خسارات كتيرة و برده هتيجي بسرعة ، خلينا فاكرين دايما مقولة:

ما طار طير و أرتفع … إلا كما طار وقع

إزاي نوظف المضاربة بشكل صحيح؟؟

لازم نتعلم إن استثمارنا يكون قائم على أدوات علمية صحيحة أيا كان الأساس اللي هنستند عليه من تحليل فني أو مالي ، و يكون هو ده الجزء الغالب و ليكن من 80 لـ 90% من حجم استثمارنا ، أما الـ 10 لـ 20% الباقيين فدول هم اللي ممكن نشتغل فيهم على المتاجرة السريعة و هنا استخدمنا لفظ المتاجرة مش المضاربة لأن إحنا مش هيبقى هدفنا مجرد إننا نستفاد من فروق أسعار بشكل عشوائي ، بالعكس إحنا برده مش هنخش في سهم إلا لما يكون فيه سبب علمي لصعوده أياً كان فني أو مالي ،و كذلك برده نستخدم أسلوب علمي في تحديد وقف خسايرنا و إدارة المخاطر الخاصة بينا … و في الحالة ديه هنتوجه للأسهم اللي بتكون حركاتها سريعة نسبيا عشان نقدر نحقق ربح في فترة قصيرة.

عشان كده لازم نتعلم صح عشان نقدر نحقق أرباح بشكل سليم و كمان نفيد بلدنا باستثمارات و نشاط اقتصادي أكبر.

يلا قولولنا بقى مين فيكوا بيستثمر ومين بيضارب؟؟ و اللي بيضارب هل هتغير فكرك و تتحول للإستثمار شوية ولا هتفضل متمسك بالمضاربة ؟؟ …. شاركونا عايزين يكون فيه مناقشة مفتوحة نستفاد منها كلنا.



 

شاهد ايضاً

ساعدنا في نشر المعرفةShare on LinkedInShare on RedditTweet about this on TwitterShare on Google+Share on Facebook
أحمد جمال

أحمد جمال

مدير الإدارة التعليمية و محلل فني للبورصة المصرية بـ Chart Voice