خليك ساموراي في البورصة … 7 خطوات نحو ربح صفقاتك

طريق المحارب في البورصة

Print Friendly, PDF & Email

أعتقد إن معظمنا إتفرج على فيلم ” The Last Samurai ” و شوفنا القائد العظيم اللي كان بيقاتل هو و جيشه بهدف رفعة الإمبراطورية اليابانية ، و شوفنا الأخلاق و المبادئ و الروح اللي مقاتلين الساموراي دول كانوا بيتمتعوا بيها.

 

The Last Samurai movie
The Last Samurai movie

 

و اللي مازال بالفعل الشعب الياباني بيتمتع بيها لغاية دلوقتي و اللي تعتبر شيء أساسي من الشخصية اليابانية و اللي كان ليها دور عظيم في تقدم اليابان و تطورها برغم الظروف الصعبة اللي كانت فيها بسبب الحرب العالمية التانية ، طيب خلونا منبعدش عن موضوعنا و نرجع تاني للساموراي و مبادئهم و اللي هم بيسموها :

 

بوشيدو = طريق المحارب

武士道

 

طيب إيه حكاية الـ بوشيدو ديه و إيه علاقتها بالبورصة و الربح منها ؟؟!!! خلونا نشوف الموضوع ده في السطور الجاية…..

—————————–

إحنا قولنا إن بوشيدو ديه معناها طريق المحارب … طيب حد هيسألني هو إحنا أصلا محاربين عشان تقولنا الطريق إزاي ؟؟!!

بص معايا كده مش إحنا في البورصة ديه أكتر الحاجات اللي بتقف في وشنا و تخسرنا مش هي السوق ؟؟ طيب مش في حاجة كمان بتخسرنا و هي نفسنا بعدم إلتزامنا لتحليلنا و قراراتنا … يبقى إحنا بنحارب الحاجات الوحشة اللي في نفسنا المتمثلة في الطمع و عدم الإلتزام ، و كمان بنحارب السوق ،،، شوفت بقى إحنا محاربين إزاي ؟!!

 

و طالما إننا محاربين لازم نكون عارفين طريق المحارب الناجح واللي هي “بوشيدو” ، و المتمثلة في 7 قيم و مبادئ لو تمتعنا بيهم هنضمن إننا نكون محاربين أقوياء و نقدر نتغلب على أنفسنا و على السوق و بإذن الله نحقق الأرباح في البورصة.

 

تعاليم الـ ” بوشيدو ” :

(1) الاستقامة (義 = Gi) :

خليك دايما واضح في الطرق اللي بتستخدمها في تحليلك و كمان خليك ثابت عليها طالما إنها أسلوب علمي أو أثبت نجاحه ، يعني مينفعش كل شوية تجرب طريقة و تروح تمشي ورا واحد كاتب ( الإستراتيجية الحلبنتيشية لتحقيق الـ 100% ) ، لأن الاستراتيجية ديه ممكن تكون ناجحة فعلا بس معاه هو لأن هو اللي عملها بما يتناسب مع أدواته و ظروفه … عشان كده لازم أنت تحط سكتك و طريقك و تكون مستقيم فيها و متخرجش عنها أياً كانت طريقة تحليلك : تحليل فني أو تحليل مالي أو أي نوع تاني أنت بتجيده.

و طبعا نفهم من ده إنك لازم تكون مستند على أسلوب علمي أصلا في تحليلك … يعني مينفعش تسمعلك كلمتين بناء عليهم تروح تتاجر في البورصة ، لكن لازم تتعلم بشكل صحيح و تتدرب مرة و أتنين و تلاتة لغاية ما تتقن الأسلوب ده عشان تضمن بنسبة كبيرة إنك تحقق مكسب بإذن الله و مش تخسر فلوسك.

 

(2) الشجاعة (勇 = Yu) :

أكتر واحد بيخسر في أسواق المال هو الجبان اللي بيخاف إنه يخش صفقة لحسن يخسر مع إن بيظهر ليه إشارة و إتنين و تلاتة كمان ، بس في كل مرة بيقول لنفسه طيب أستنى شوية لحسن أخش و السعر بعد كده يعكس عليا …. و بيفضل كده لغاية ما ييجي في وقت يقرر إنه يخش السوق فعلا بس الوقت ده بيكون كل الناس بالفعل اشترت من فترة و حققت مكسب كفاية و بالتالي بتقرر إنها تبيع عشان تجني أرباحها ، في حين إن صاحبنا إياه لسه داخل السوق و بالتالي السعر يقوم واخده و نازل و بالتالي يخسر فلوسه 😥  .

فخليك دايما شجاع 😎  (بس مش متهور) يعني لما تلاقي فرصة شراء  خش و أشتري لقيت فرصة تانية خش تاني و متستناش و تتأخر كتير ، طالما إنك شوفت السبب الكافي لدخولك و أكيد طالما إنك دخلت من مكان صح هتلاقي نفسك بتكسب صح ، و برده طالما إنك دخلت على سبب مش هتخرج إلا بسبب و بالتالي أرباحك هتتضاعف … لكن خلي بالك إنك طالما مشوفتش سبب مقنع لدخولك أوعى تدخل لأن ديه ساعتها مش شجاعة لكنه إنتحار لأنك بتخاطر من غير متأمن نفسك أو تحسب مخاطرتك ديه.

<< من الأخر كده لو معرفتش تبقى شجاع في المجال ده … يبقى المكان ده مش مكانك ولا المجال ده مجالك >>

 

(3) الاحترام (礼 = Rei) :

احترم خطتك …. مينفعش مثلا تبقى محدد نسبة معينة للخسارة في الصفقة ، و لما النسبة ديه تتحقق متخرجش منها و ده لأنك مش عايز تخرج من الصفقة خسران … لأنك لوعملت كده أعرف إنك حتى لو طلعت من الصفقة ديه مش خسران فعلاً هتلاقي نفسك خسران في غيرها و غيرها و بالتالي هتلاقي نفسك خسران فلوسك.

عشان كده لازم لما تحط خطة تحترم قواعدها و تلتزم بيها مش مجرد إنها قواعد على ورق ، وده معناه إنك تحترم كل قواعد خطتك ، لأن اليوم اللي مش هتلتزم فيه حتى و لو بقاعدة واحدة أعرف إن ديه أول خطواتك لكسر خطتك بمعنى إنك هتبقى تحت رحمة السوق و ديه أولى خطواتك للخسارة لأن السوق للأسف مش بيجامل حد 👿 .

 

(4) الصدق (誠 = Makoto) :

خليك دايما صادق مع نفسك طالما إنك قررت إنك تستثمر في مجال أسواق المال … واحد هيقولي ” إزاي يعني؟؟!! “

هقولك يا سيدي … يعني تيجي مثلا تلاقي واحد محفظته مش كبيرة و بالتالي بيكون نوعه مستثمر قصير الأجل و يخش في سهم أو عملة بناء على حجم استثماراته ديه ، و بعد ما يخش الصفقة و السوق مرة واحدة يعكس عليه تلاقيه واحدة واحدة خلى وقف الخسارة بتاعه أبعد و كمان في بعض الأحيان ممكن يشيله خالص … و لما تسأله ليه عملت كده ؟؟

يقولك: ” أصل أنا مستثمر طويل الأجل و الوقف ده قريب جدا فممكن يتضرب .. عشان كده خليته أبعد ” ، تقوله: ” بس أنت كده هتخسر كتير ” , يقولك: ” يا سيدي و مين قالك إني هخرج أديهم موجودين دولا ولا بياكلوا ولا بيشربوا (أعتقد الناس بتوع البورصة بالأخص عارفين الجملة ديه كويس 😕  ) “.

في الحقيقة الأسهم ديه بتاكل و تشرب و كمان مش بتكبر طالما إنها في إتجاه هابط ، لأنها بتاكل من فلوسك و من أعصابك و من صحتك …. و بالتالي لازم تكون صادق مع نفسك و مع قراراتك عشان تقدر تحقق نجاح في البورصة.

 

(5) الشرف (名誉 = Meiyo) :

تحلى دايما بالشرف و أنقل فقط العلم و المعلومة الصحيحة ، و متروجش أبدا لإشاعة أو لفكرة غلط حتى لو هتستفاد منها ، و أعرف إنك لو أنت النهارده اللي هتستفاد فبكرة الدايرة هتدور عليك و هتبقى أنت في موضع الخسران و الضحية ؛ و متخافش أبدا مش معنى إنك عارف معلومة صح فلو نقلتها لحد هو كمان هيكسب و بالتالي هياخد من فرصتك في المكسب … بالعكس تماماً طول ما إحنا بننشر فكر و علم صح حتى لو معلومة صغيرة ده هيخلي بيئة الاستثمار أفضل و أفضل وبالتالي المستفيدين منها هيبقوا أكتر و يعم الخير علينا جميعاً.

<< و متنساش أبداً : إن اللي هتزرعه النهارده ، هتحصده بكرة 🙂  >>

 

(6) الإخلاص و الولاء (忠義 = Chuugi) :

خلي دايما عندك إخلاص و ولاء لعلمك و لإستراتيجيتك ، و مش معنى إنك في وقت حققت كذا خسارة إنك تروح تدور على طريقة تانية … لأن طالما إن طريقتك أو إستراتيجيتك ديه أنت كنت ناجح بيها فده معناه إنك إتعودت عليها و بقيت بتعرف تشتغل بيها كويس ، فمش معنى إنها جت في وقت و محققتش المطلوب إنها فشلت و لكن ده ممكن يكون ليه أسباب و عوامل تانية كتير ممكن تكون متعلقة بتغيرات في حركة السوق مثلا.

طبعا مش معنى كده إنك تفضل ثابت عليها و مش تطورها ، لأن التطوير دايما محبذ و مطلوب لما يكون قايم على أساس علمي طبعا ، لكن اللي نقصده إنك مينفعش إنك كل شوية ترمي اللي وصلتله و تروح تبني أو تدور على حاجة تانية من أول و جديد.

<< إتعلم من القديم و ضيف عليه 😉  >>

 

(7) الإحسان و البر (仁 = Jin) :

من الإحسان و البر في مجالنا ده إنك تفيد اللي حواليك و متدخرش أي علم لنفسك طالما إنك تقدر تنفع بيه الناس ، و افتكر تاني إن زي ما قولنا من شوية: ” ده مش هيضيع عليك فرص ولا هيقلل مكسبك بالعكس ده هيحسن السوق بشكل كامل و هيخلي المستفيدين أكتر و أكتر ” ، و هتلاقي زي ما أنت النهارده نقلت علمك لحد … بكرة هتلاقي اللي بينقل علمه ليك.

و برده من الإحسان إننا مننساش الفقراء و المحتاجين طالما إن ربنا ميسرلنا حالنا و بنكسب ، ساعتها أعرف إن ربنا هيباركلك أكتر في أرباحك اللي بتكسبها.

 

من الأخر كده لو تمسكت بالسبع صفات اللي قولناهم دول أعرف إنك بإذن الله هتقدر تكسب و تحقق أرباح في البورصة أو في الفوركس ، و مش هم بس ده أنت لو أتبعت الصفات ديه في أي حاجة في حياتك أعرف إنك أكيد هتنجح فيها ، و عشان كده اليابانيين دلوقتي ناجحين في كافة المجالات … و إن كانت الصفات ديه مقاتلين الساموراي دونوها و كتبوها في القرن الـ 17 فسبقهم بكتير نزول رسالة الإسلام الحنيف اللي أكدت على القيم و الصفات ديه و أكتر منها كمان ، و من قبله جميع الرسالات السماوية طبعا …. كل اللي عمله الساموراي و من بعدهم اليابانيين الجدد إنهم تمسكوا بالقيم ديه.

 

( الاستقامة / الشجاعة / الاحترام / الصدق / الشرف / الاخلاص و الولاء ) … خلونا نلتزم بالقيم ديه أكتر منهم.

 

دمتم ناجحين و كسبانين  😀 


اقرأ ايضا : 

 5 طرق تخرج بيهم من صفقاتك في البورصة

أجمل شئ في البورصة الخسارة .. تعرف ليه ؟؟

5 قواعد للمتاجرة في اسواق المال من ED Seykota

شاهد ايضاً

ساعدنا في نشر المعرفةShare on LinkedInShare on RedditTweet about this on TwitterShare on Google+Share on Facebook
أحمد جمال

أحمد جمال

مدير الإدارة التعليمية و محلل فني للبورصة المصرية بـ Chart Voice