5 طرق تخرج بيهم من صفقاتك في البورصة

مقالة - الخروج من صفقات البورصة

Print Friendly, PDF & Email

عمرك دخلت صفقه في البورصة أو الفوركس وكنت كسبان ومحقق ربح كويس والنتيجه النهائية معاك انك قفلت الصفقه على خساره ؟؟

 

كتير مننا اتعرض للموقف ده .. واللي ممكن يكون راجع لأسباب كتير منها إدارتك للصفقه وهنشرح الموضوع بإستفاضه في اكتر من مقال وهنبدأ دلوقتي بعكس ما كل الكتب ما بتبدأ كلامها في انك ازاي تدخل صفقه ..

 

طرق الخروج من الصفقة في البورصة

 

الطريقة الأولى : ان السعر يوصل لمستوى وقف الخسارة  🙄

 

اوعى تفتكر ان السعر لما يوصل معاك لمستوى وقف خسارة دي حاجه وحشه ،، بالعكس انت إلتزامك بوقف الخسارة وتقبلك للخسارة الصغيره هو ده اللي هيخليك تعمل فلوس في البورصة او الفوركس .. لأن حتى لو السعر وصل لمستوى وقف الخسارة  وقفلت صفقتك على خسارة .. ممكن في صفقه واحده تحقق ارباح تغطي 3 او 4 صفقات خسروا .. زائد ان وقف الخساره ده الهدف الأساسي منه هو حمايتك (( حمايتك من خساره فلوسك وثقتك في نفسك وفي المجال )) وهديكم مثال :

 

تخيل معايا اتنين داخلين البورصة مع بعض ( احمد & حسين )

 

قصة احمد و حسين في البورصة
قصة احمد و حسين في البورصة

 

الطريقة التانية : ان السعر يوصل للمستهدف  😀 

 

خروجك عند المستهدف معناه انـك حققت مكسبك اللي كنت محدده قبل ما تدخل الصفقه .. بس في وسواس بيجي للناس لما السعر بيقرب للمستهدف اسمه :

 

Let the Profit Run

 

ودي حاجه مش غلط  .. بس تتأكد ان فعلاً ادواتك بتقولك ان السعر ممكن يكمل ، وكمان ممكن وقتها تستخدم الطريقه التالته عشان لو السوق عكس عليك تبقي انت في الآمان .

 

الطريقة التالته :  اغلاق الصفقه عن طريق الـ TRAILING STOP  😯 

 

 الـ Trailing Stop هو وقف خساره متحرك ، يعني مثلا لو انت حاطط وقف خسارتك عند نقطه وشاري سهم والسهم طلع بيك ممكن تنقل وقف الخساره علي نقطه الدخول وبكده لو السهم نزل مش هتخسر اي حاجه والاسلوب ده ناس كتيره بتستخدمه في سوق الفوركس .

 

هنفترض انك مشيت بالأسلوب ده وعملت 50 نقطه للـ Trailing Stop .. وانت شاري علي 250 والسعر فضل يطلع لحد ما وصل 400 ( معني كده ان وقف الخسائر المتحرك فضل يطلع معاك لحد 350 ) ولو السعر قلب عليك هتلاقي نفسك في النهاية خارج من الصفقه بمكسب .

 

الطريقة الرابعة اسمها Time Stop

 

 

مش اوقات ممكن تقفل الصفقه عشان وصلت لمستوى خسارة معين انت بعده مش هتستحمل خسائر اكبر ؟؟ الطريقة دي بتعتمد على الوقت ، بتقولك انك لازم تكون محدد في مدة الصفقه .. يعني انت مثلا داخل صفقه قصيرة الأجل .. مينفعش لو خسرت تقول مـا انا مستثمر طويل الأجل …

 

تحديدك للوقت معناه تجميدك لفلوسك لمده معينه .. وعليه انت بتشوف هل الاستثمار ده يستحق الوقت ده ولا لأ ؟

 

يعني لو انا قولتلك هات 1000 جنيه واحطهالك في البورصة وبعد سنه ادهالك 1200جنيه ؟؟ ممكن انت تشوف ان دي مده طويله جداً علي استثمار بعوائد 20 % في السنه .. وواحد تاني يشوفها مناسبه .

 

الطريقه الخامسه: هي ان سبب دخولك الصفقة اتغير !!

خلينا نكون متفقين انـ كل واحد فينا لما بيفتح صفقه بيكون فاتحها لسبب ، وبناء عليه لو أعدت استخدام ادواتك ولقيت ان السبب ده اتغير انت مش مضطر تكمل في الصفقه لأن السبب اللي انت داخل عشانه اتغير ومبقاش موجود .

 

مثال : لو انا داخل الصفقه عشان في شكل من اشكال التحليل الفني زي Head and shoulder  ودخلت الصفقه والدنيا معايا تمام وكسبان وفجأة الشكل ده فشل زي مـا هتشوفوا في الصور .

دخول الصفقه لهذا السبب

 

 

في الحالة دي السبب اللي دخلت عليه صفقتي أتغير وبناء عليه لو حللت من جديد ولقيت انـ رؤيتي للوضع الحالي مختلفة .. يبقي في الحالة دي ممكن متكملش الصفقه وتخرج منها افضل .

 

————————————————–

الملخص في 5 طرق للخروج من الصفقة :

 

    • وصول السعر لمستوى وقف الخسائر
    • وصول السعر للمستهدف
    • غلق الصفقه عن طريق الـ Trailing Stop
    • غلق الصفقه بسبب الـ Time Stop
    • ان السبب اللي دخلت علشانه الصفقه اتغير

 

 

ملحوظة : اياً كان الطريقه اللي بتستخدم بيها نصيحه اوعى تستغنى عن أول طريقه

 

قولنا بقي ايه أكتر طريقه من دول بتستخدمها وهل في طرق تانيه بتستخدمها مش موجوده هنا حابب تشاركنا بيها ؟؟  


اقرأ ايضا :

أجمل شئ في البورصة الخسارة .. تعرف ليه ؟؟

5 قواعد للمتاجرة في اسواق المال من ED Seykota

شاهد ايضاً

ساعدنا في نشر المعرفةShare on LinkedInShare on RedditTweet about this on TwitterShare on Google+Share on Facebook
كريم عصام

كريم عصام

مدير إدارة التسويق و محلل فني للأسواق العربية بـ Chart Voice ، عمل سابقا كمحلل فني بشركة ICN للاستشارات المالية