4 نصايح لازم تعرفهم قبل ما تشتري أسهم في البورصة

4 نصايح لازم تعرفهم قيل ما تشتري أسهم في البورصة

Print Friendly, PDF & Email

لو أنت قررت إنك تخش البورصة النهارده و ناوي تشتري أسهم …. أستنى أثبت مكانك و أوعى تعمل حاجة ، لازم تقرأ الموضوع ده قبل ما تخش في أي سهم ، لأنك لما تخلص الموضوع ده و لما تاخد بالك من النصايح ديه هتتجنب جزء كبير من خساير محتملة كنت ممكن تقع فيها.

 

و زي ما شوفنا اسم الموضوع فهو : ” 4 نصايح لازم تعرفهم قبل ما تقرر تشتري أسهم في البورصة ” :

 

1) حدد هدفك:

مينفعش يكون إمبارح جه في بالك إنك تستثمر في البورصة فتقوم تقرر إنك تشتري أسهم النهارده من غير ما تعرف هدفك إيه من الاستثمار ده … يعني مثلا لازم في البداية تسأل نفسك ” أنت هتستثمر لفترة قصيرة و تسحب فلوسك تاني ولا هتستثمر لفترة طويلة ممكن تمتد لسنين؟؟ ” ، أسأل نفسك برده ” هو أنا شخص مخاطر ولا محافظ أو مش بحب المخاطرة العالية؟؟ ” 🙄  …. لأن كل سؤال من دول هيخليك تمشي بشكل صح في استثمارك و كمان تشتري السهم المناسب لظروفك و اللي يحقق أهدافك.

Target

 

2) أبعد عن إنخفاض السيولة:

دايما أبعد عن الأسهم اللي السيولة الداخلة ليها و الخارجة منها قليلة (بمعنى أصح الأسهم اللي مفيش عليها حركة و تداول كبير) … و ده راجع لسببين مهمين جداً:low liquidity

أولهم : إن أنت ممكن تشتري سهم سيولته قليلة بسعر معين فلنفترض 1.00 جنيه ، و السعر ارتفع لغاية 1.60 جنيه بمعنى إنك بقيت كسبان 60% ، و حبيت إنك تبيع الأسهم ديه لأنك مثلا شايف إن ده ربح مناسب أو لأنك محتاج الفلوس اللي أنت اشتريتهم بيها ، فجاي بتعرضهم للبيع ملقتش حد يشتري منك  …. أعتقد ساعتها هنحس إنها مشكلة خاصة لو كنا محتاجين الفلوس جدا فغصب عننا هنلاقي نفسنا بنعرض السهم بسعر أقل لأننا محتاجين نبيعهم و نتيجة لده ممكن نلاقي نفسنا خسرنا الأرباح اللي كنا كسبناها أو حتى خسرنا من رأس مالنا 😥 .

 

طيب تاني سبب (و اللي هو مهم جدا) : إن إحنا قبل كده كنا قولنا إن التحليل الفني هو دراسة لنفسية المتعاملين في السوق من خلال الرسم البياني ، طيب تخيل بقى إن المتعاملين على السهم عددهم قليل هل تعتقد إن ساعتها هيكون تحليلنا الفني صحيح؟؟!!! … طيب أفرض تحليلك صحيح و بعد ما اشتريت جه أحد المتعاملين دول و باع كمية كبيرة من السهم ده ، في الحالة ديه هتلاقي إنخفاض كبير في السعر و ده سببه إن المتعاملين على السهم عددهم قليل و بالتالي الوزن النسبي للمتعامل الواحد بيكون كبير و بالتالي ليه تأثير كبير.

[alert type=warning]عشان كده لازم نبعد عن الأسهم اللي السيولة بتاعتها منخفضة ، و ندور على الأسهم اللي فيها سيولة عالية.[/alert]

 

3) تجنب الاكتتابات:

لو أنت كنت حابب تستثمر في البورصة باستخدام التحليل الفني فأبعد عن الأسهم المصدرة حديثاً ، و ده لأن أوقات كتير بيكون الناس شايفين إن القيمة اللي تم إصدار السهم بيها بتكون قيمة أعلى مما تستحق الشركة و بالتالي مبيكونش عندهم رغبة في شراء السهم ده ، و ده اللي بيسبب في إنخفاض سعره …. و كمان فيه نقطة تانية و هي إن أحد مبادئ التحليل الفني هو إن التاريخ بيعيد نفسه ، و بالتالي لازم يكون عندنا تاريخ في السهم ده عشان نقدر نحكم عليه و ناخد فيه قرارات.

ipo-zoloto

 

4) استثمر في الأسهم القوية فنياً و مالياً:

خلي دايما خطوتك الأولى هي إنك تستخدم التحليل الفني و أول ما تلاقي سهم إتكون فيه إتجاه تقدر تدخل فيه ، إتأكد من إن السهم ده موقفه المالي قوي ، و ساعتها هتقدر تخش و أنت متطمن إن السهم ده هيتحرك في الإتجاه اللي أنت متوقعه و اللي يعظم مكاسبك و أرباحك … و من هنا نقدر نقول إن التحليل الفني و المالي مش متنافسين بالعكس هم بيكملوا بعض (التحليل الفني و المالي .. إيد واحدة 🙂  ).

hand

 

خد الأربع نصايح دول دايما في إعتبارك مش بس أول ما تقرر إنك تخش المجال و تكون لسه جديد فيه … لأ و كمان لو كنت مستثمر قديم قبل كل مرة هتقرر إنك تخش فيها سهم جديد.


اقرأ ايضا : 

11 قاعدة للمتاجرة اليومية الناجحة في البورصة أو الفوركس

5 قواعد للمتاجرة الناجحة في اسواق المال لـ Ed Seykota


شاهد ايضاً

ساعدنا في نشر المعرفةShare on LinkedInShare on RedditTweet about this on TwitterShare on Google+Share on Facebook
أحمد جمال

أحمد جمال

مدير الإدارة التعليمية و محلل فني للبورصة المصرية بـ Chart Voice