الوقف الفني Vs الوقف المالي


Print Friendly, PDF & Email

* إحترمني أنا … أنا الأهم.

– لأ احترمني أنا … أنا الأقوى.

* اسمع مني ؛ بقولك إحترمني أنا .. عشان متخسرش فلوسك.

– سيبك منه و احترمني أنا  ، أنا أقوى و مبضربش.



و ديه كانت خناقة بسيطة ما بين وقف الخسارة المالي و وقف الخسارة الفني ، بس تقريبا بنشوفها كل يوم … و مش بس كده ده عقلنا هواللي بيشعلل الخناقة ديه مع كل صفقة.

 

طيب خلونا نبص كده ممكن نحل المشكلة ديه إزاي؟؟

 

أولا: خلينا نشوف هي المشكلة إتوجدت إزاي؟؟

 

المشكلة إتوجدت لما قررنا نحط وقف خسارة … طيب لما نفكر إيه هو هدف إننا نحط وقف الخسارة؟ خلينا نقول إنه بمثابة خط دفاع ليك في حال ما إذا حصل غير اللي كنت متوقعه من تحليلك ، أو بشكل تاني هو المكان اللي عنده رؤيتك اللي شايفها هتتغير و تكون موقف معاكس ، و بالتالي بنحط وقف الخسائر عشان أول ما السعر يوصل للمنطقة ديه نخرج من الصفقة و تكون خسايرنا قليلة… و من النقطة ديه في سؤال تاني بيطرح نفسه.

 

ثانيا: هل بنكون عايزين وقف الخسائر بتاعنا يتضرب؟؟

 

بالطبع لأ لأن في الأخر وقف الخسائر بيمثل خسائر و بالتالي اللي بنتمناه إن الوقف ميتضربش و السعر يتحرك زي ما إحنا عايزين عشان نحقق ربح …. و من هنا بيعلنا صوت في دماغنا يقولنا :”إذن الحل في وقف الخسائر المبني على تحليل فني” … و ده لأن بالطبع إحنا منقدرش نضمن إن فيه وقف ميضربش بنسبة 100% لكن اللي نقدر نعمله إننا نقلل نسب إحتمالية ضربه على قدر المستطاع ، وبما إن التحليل الفني هو دراسة لزيادة توقع سيناريو معين ؛ إذن السيناريو التاني هو الأقل في الحدوث و بالتالي هو ده الوقف الأقوى …. لكن على فرض إن الوقف ده على بعد يخليني هخسر مثلا 7% في الصفقة ديه ، و ده طبعا رقم كبير جدا إن الواحد يخسره في صفقة واحدة … وده يحدفنا لسؤال تالت مهم.

 

وقف الخسارة الفني

 

ثالثا: إزاي أحافظ على إدارة مخاطري وإدارة أس مالي؟؟

 

هنا بييجي الطرف التاني في الخناقة و اللي بيقول إنك لازم تحط الوقف على ما يتناسب مع خطتك و إدارة مخاطرك … و اللي مثلا ممكن تكون 3% ، وبالتالي تحط الوقف على المكان اللي لو السعر وصله متخسرش أكتر من الـ 3% دول.

وقف الخسائر المالي
وقف الخسائر المالي

 

أوبس … طيب ما المنطقة ديه ممكن تتضرب بسهولة لأن مفيش أي سبب فني يخليها قوية و بالتالي هخسر فلوسي ،،،، إيه ده يا سيدي ما أنت دخلتنا في الحيط  تاني أهو و موصلناش لحاجة … حلها بقى زي ما عقدتها.

 



طيب خلينا نشوف هو مين الأهم فعلا ومين اللي لازم يكون ليه اليد العليا (الفني ولا المالي)؟؟

في الحقيقة الأهم هو وقف الخسارة المالي ، لأن الوقف ده بيكون متوافق مع إدارة رأس مال و مخاطر كاملة ، هدفها الحفاظ على أصل رأس مالك ثم زيادته ، لكن لو إعتمدنا على الحل بتاع الوقف الفني فاللي هيخليك تحط المرة ديه الوقف بتاعك على بعد يخليك تخسر7% من رأس مالك ، سهل جدا إنه المرة الجاية يخليك تحط وقف خسارة يخسرك 30% من حسابك ، و بالتالي بعد أربع أو خمس صفقات هتلاقي نفسك خسرت رأس مالك بالكامل …. طيب عشان نحل المشكلة  ديه كلها نعمل إيه؟؟!!! فيه حلين:

 

  • أولهم إنك تحترم خطتك لإدارة المخاطر و متخشش الصفقة ديه عشان متحطش وقف في منطقة سهل إنها تتضرب و بالتالي تبقى خسرت الصفقة … و متقلقش السوق مبيبطلش يطلع صفقات يعني لا هي الأولى  ولا هتكون الأخيرة << و ده الحل اللي بنفضله >>.

 

  • ثاني الحلول هو إنك تحاول تشوف نقطة تصلح كدعم فني على فريم أصغر ، يعني لو مثلا كنت بتتاجر على النطاق اليومي و السعر عامل إتجاه صاعد و كان الوقف الفني اللي هو على أخر دعم ظهرلك في خط الإتجاه  ده هيخليك تخسر 7% من حسابك ، ساعتها ممكن تنزل على النطاق الأقل (4 ساعات مثلا) هتلاقي إن الحركة ظهر فيها دعوم و مقاومات جديدة … ساعتها تقدر تختار منهم دعم كويس لو ضربه يخسرنا بس نسبة 3% أو أقل (على المثال الحالي –  تتغير على حسب خطتك لإدارة رأس المال) ؛ وطبعا هتكون عارف إن الوقف ده فني أينعم بس أكيد أضعف من الوقف الفني الأولاني لأنه متاخد على فريم أقل.

و بكده نكون حلينا المشكلة و الخلاف و الخناقة الدايرة بشكل دائم بين الوقف المالي و الوقف الفني … بس المهم إنك تكون عارف إن الإتنين مهمين بس في الأخر لازم تحترم وقفك المالي لأن لو الفني هيكسبك صفقة ، فالمالي هو اللي هيكسبك في استثمارك كله.

 

ها قولونا بقى بتبقوا واقفين في طرف مين لما الخناقة ديه بتقوم؟؟؟ و قولولنا لو عندكوا طرق تانية بتقدروا بيها تصلحوا ما بينهم 😉

لو عايز تتعلم اكتر عن البورصة .. احنا الأيام الجايا هنبدأ كورس هتدرب فيه على ازاي ممكن تشتغل او تستثمر داخل البورصة ممكن تتابع كل تفاصيله من هنا 

شاهد ايضاً

ساعدنا في نشر المعرفةShare on LinkedInShare on RedditTweet about this on TwitterShare on Google+Share on Facebook
أحمد جمال

أحمد جمال

مدير الإدارة التعليمية و محلل فني للبورصة المصرية بـ Chart Voice